முறைப்பாடு வழங்க சென்ற பெண்ணுக்கு பாலியல் தொல்லை

முறைப்பாடு வழங்க சென்ற பெண்ணுக்கு பாலியல் தொல்லை

 ஆந்திர மாநிலம் சித்தூர் மாவட்டம் பீலேரு பகுதியை சேர்ந்த 27 வயதுடைய சம்யுக்தாக்கும் இவரது கணவருக்கும் இடையே குடும்ப பிரச்சினை நிலவியது. இதனால் கணவரின் குடும்பத்தார் மீது பீலேரு பொலிஸ் நிலையத்தில் கடந்த ஒரு மாதத்திற்கு முன்பு சம்யுக்தா முறைப்பாடு அளித்தார்.

அப்போது அங்கு இன்ஸ்பெக்டர் தேஜோமூர்த்தி இருந்தார். முறைப்பாட்டடை பெற்ற இன்ஸ்பெக்டர் இளம்பெண்ணின் தொலைபேசி இலக்கத்தை வாங்கி கொண்டார்.

அதன் பின்பு இளம்பெண்ணுக்கு தொலைபேசியில் பேசிய இன்ஸ்பெக்டர் உனக்கு சாதகமாக நடவடிக்கை எடுக்க வேண்டும் என்றால் என்னுடைய ஆசைக்கு இணங்க வேண்டும் என்று தொலைபேசியில் பேசி வந்தார். வாட்ஸ்- அப்பிலும் தகவல் அனுப்பியுள்ளார். வீட்டுக்கும் சென்று அடிக்கடி செக்ஸ் தொல்லை கொடுத்து வந்தார்.

இந்த நிலையில் நேற்று காலை இளம்பெண்ணை தொலைபேசியில் தொடர்பு கொண்ட தேஜோமூர்த்தி திருமலை பிரம்மோற்சவ விழா பாதுகாப்பு பணியில் ஈடுபட்டுள்ளேன். அதனால் எனக்கு இங்கு ரூம் கொடுத்து உள்ளனர். உடனே புறப்பட்டு திருமலைக்கு வரவேண்டும் என கட்டாயப்படுத்தி உள்ளார்.

இன்ஸ்பெக்டரின் தொல்லை அதிகரித்ததால் ஆவேசமடைந்த சம்யுக்தா திருப்பதிக்கு வந்து டி.ஐ.ஜி. சீனிவாசராவை சந்தித்து இன்ஸ்பெக்டர் தொலைபேசியில் பேசிய ஆடியோ மற்றும் வாட்ஸ் அப்பில் அனுப்பிய தகவலை கொடுத்து முறைப்பாடு செய்தார்.

இதுகுறித்து விசாரணை நடத்திய டி.ஐ.ஜி. சீனிவாசராவ் இன்ஸ்பெக்டர் தேஜோ மூர்த்தியை பணி நீக்கம் செய்து உத்தரவிட்டார். இதுபற்றி தகவல் அறிந்த இன்ஸ்பெக்டர் தலைமறைவாகி விட்டார்.